ಅಕ್ಕ ದೂರಿಟ್ಟಾಗ

ಅಕ್ಕನೆಂಬ ಕಾರಣಕ್ಕೆ
ನೋಡ ನೋಡುತ್ತಲೇ ಲಂಡೋರಿ ಲಾಗ
ಹಾಕುತ್ತಿರುವ ಅವಳ ಗಾಳಿಪಟ
ಮೇಲೆ ನೋಡುತ್ತಾ ಓಡಿ ಓಡಿ
ಗೋಡೆ ಹತ್ತಿ
ಓಣಿ ಹಾರಿ
ಕಲ್ಲೆಡವಿ
ಕೆಸರ ಪಿಚಕಾರಿ
ಕಾಲಕೆಳಗೆ ಜಾರಿ
ಕೊನೆಗೆ
ಪುಂಡ ಪೋಕರಿಗಳು
ಗಾಳ ಸಿಕ್ಕಿಸಿ ಲಪೆಟ್
ಮಾಡಿದಾಗ
ಕತ್ತರಿಸಿ ಕೆಳಗೆ
ಬಿದ್ದುದನ್ನು ಹೆಕ್ಕಲು ಹೊಡೆದಾಟ
ಅದು ಗೊತ್ತಲ್ಲ
ಯಾರು ಹೆಕ್ಕುತ್ತಾರೋ ಅವರದೇ ಹಕ್ಕು
ಅಂಗಿ ಗುಂಡಿಗಳು ಪಟಪಟನೆ
ಸಿಡಿದು ಕಪಾಳದಂಚಿನ ನರನಾಡಿ
ಅಷ್ಟಾದರೂ ಬಿಡದೆ
ಹರಿದ ಕಾಗದ
ಮುರಿದ ಕಡ್ಡಿಗಳಿಗೆ
ಸಿಕ್ಕು ಕೊಂಡಿರುವ
ಉದ್ದ ಬಾಲಂಗೋಚಿಯ ಸುತ್ತಿ
ಅಲ್ಲಲ್ಲೇ ಉಳಿದ ಬಿಳಿ ಕಾಟನ್ ಹಗ್ಗವ
ನೆಲದುದ್ದಕ್ಕೆ ಎಳೆದಾಡುತ್ತಾ
ಮನೆಗೆ ಬಂದಾಗ
ನೋಡಮ್ಮ ನಾನು ಬೇಡ ಬೇಡ
ಅಂದರೂ
ಆ ಪುಂಡರೊಂದಿಗೆ ಹೊಡೆದಾಡಿ
ಅಂಗಿ ಹರಿದುಕೊಂಡು ಬಂದಾನೆ
ಅಂತ ದೂರಿತ್ತಳೇ
ನನಗದು ಸೋಜಿಗ !
ಅಯ್ಯೋ ಅಕ್ಕ!